មនុស្ស២នាក់រងរបួសធ្ងន់ខណៈជិះម៉ូតូបុកជាមួយរថយន្ដបត់ឆ្វេងឆ្លងផ្លូវ
21-November-2017 | ដោយ ពលមនសិការ
កណ្ដាល ៖ រថយន្ដមួយគ្រឿងបើកបត់ឆ្វេងឆ្លងផ្លូវខ្វះការប្រុងប្រយ័ត្ន បណ្ដាលឲ្យម៉ូតូមួយគ្រឿងទៀតជិះបុកពេញមួយទំហឹង ធ្វើឲ្យជនរងគ្រោះជាអ្នកជិះម៉ូតូទាំង២នាក់រងរបួសធ្ងន់នៅនិងកន្លែងកើតហេតុ ។ ករណីគ្រោះថ្នាក់ចរាចរណ៍ខាងលើនេះ១៣និង៣០នាទី ថ្ងៃទី២០ ខែវិច្ឆិកា ឆ្នាំ២០១៧ លើកំណាត់ផ្លូវជាតិលេខ៦ ត្រង់ចន្លោះគីឡូម៉ែត្រលេខ២០-២១ ស្ថិតក្នុងភូមិព្រែកថ្មី ឃុំព្រែកអញ្ចាញ ស្រុកមុខកំពូល ខេត្តកណ្តាល ។
មន្ដ្រីនគរបាលចរាចរណ៍ស្រុកមុខកំពូលបានឲ្យដឹងថា ជនរងគ្រោះមាន២នាក់ ទី១-ឈ្មោះ គា ចំរើន ភេទប្រុស អាយុ១៦ឆ្នាំ មានទីលំនៅភូមិព្រែកយាយហ៊ិន១ ឃុំឫស្សីជ្រោយ ស្រុកមុខកំពូល ខេត្តកណ្ដាល ជិះម៉ូតូម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខ កណ្ដាល1W-7214 (របួសធ្ងន់) និងជនរងគ្រោះទី២-ឈ្មោះ រួមដំណើរជាមួយឈ្មោះ អឿ ថាវីន ភេទប្រុស អាយុ១៦ឆ្នាំ មានទីលំនៅភូមិកណ្ដាល ឃុំព្រែកអញ្ចាញ ស្រុកមុខកំពូល ខេត្តកណ្ដាល (ជាអ្នករួមដំណើររងរបួសធ្ងន់) រីឯរថយន្ដបង្កម៉ាកហ៊ីយ៉ាន់ដាយ ពណ៌សលាយឈាមជ្រូក ពាក់ស្លាកលេខភ្នំពេញ 3B-2631 បើកបរដោយជនមិនស្គាល់អត្ដសញ្ញាណ ទុករថយន្ដចោលរត់គេចខ្លួនបាត់ស្រមោល ។
ប្រភពដដែលបន្ដថា នៅមុនពេលកើតហេតុសាក្សីបានឃើញរថយន្ដបង្កម៉ាកហ៊ីយ៉ាន់ដាយ បើកបរតាមបណ្ដោយផ្លូវជាតិលេខ៦ ក្នុងទិសដៅពីត្បូងទៅជើង លុះមកដល់ចំណុចកើតហេតុ ស្រាប់តែរថយន្ដបង្កបានបត់ឆ្វេងឆ្ពោះទៅទិសខាងលិច ដោយធ្វេសប្រហែសនិងមិនប្រុងប្រយ័ត្នត្រង់ចំណុចផ្លូវដែលមានស្ថានភាពគ្រោះថ្នាក់នោះទេ ខណៈនោះផងដែរក៏មានម៉ូតូមួយគ្រឿងម៉ាកហុងដាឌ្រីម ធុនសេ១២៥ ជិះដោយជនរងគ្រោះទាំង២នាក់ខាងលើ ឈប់មិនទាន់ជាន់ហ្វ្រាំងមិនជាប់បានបុកជាមួយរថយន្ដពេញមួយទំហឹង បណ្ដាលឲ្យជនរងគ្រោះជាអ្នកជិះម៉ូតូទាំង២នាក់ដួលបោកទៅលើផ្លូវទទួលរងរបួសធ្ងន់តែម្ដង រីអ្នកបើកបរថយន្ដបានទុករថយន្ដចោលនៅកន្លែងកើតហេតុ រួចរត់គេចខ្លួនបាត់ស្រមោល។ ក្រោយពីមានហេតុការណ៍កើតឡើង ជនរងគ្រោះទាំង២នាក់ត្រូវបានរថយន្ដសាមុយដឹកបញ្ជូនទៅសង្គ្រោះនៅមន្ទីរពេទ្យ ។ ចំណែកឯមធ្យោបាយពាក់ព័ន្ធត្រូវបានសមត្ថកិច្ចនគរបាលចរាចរណ៍ធ្វើការវាស់វែងកសាងឯកសារដកហូតយកទៅរក្សាទុកនៅអធិការដ្ឋាននគរបាលស្រុកដើម្បីចាត់ការតាមនីតិវិធីច្បាប់ ។
ប្រភពពីសមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍ខាងលើនេះ គឺបណ្ដាលមកពីអ្នកបើករថយន្ដមិនប្រុងប្រយ័ត្នក្នុងស្ថានភាពផ្លូវដែលគ្រោះថ្នាក់ ខណៈដែលបត់ឆ្វេង ទើបបានជាជនរងគ្រោះជិះបុកពេញមួយទំហឹងទទួលរងរបួសធ្ងន់បែបនេះ ៕
ចំនួនអ្នកទស្សនា
- ថ្ងៃនេះ2591
- ម្សិលមិញ10851
- សប្តាហ៍នេះ69111
- ខែនេះ184261
- ឆ្នាំនេះ184261
- សរុប20626717